«QazIndustry» АҚ, "Қазмырыш" және "Қазақмыс" корпорацияларының мамандары бірлесе Абай облысының бірқатар өнеркәсіптік кәсіпорындарына барды. Кәсіпкерлерге мемлекет тарапынын көрсетілетін қолдау мен ынталандыру шаралары түсіндірілді.

Көшпелі тур барысында делегация "Қазэлектромаш", "Азия Энергокомплект", "Ист Индастри Компани ЛТД.", "СемАЗ", "Daewoo Bus Kazakhstan", "Семей құю-механикалық зауыты" және "Семей Инжиниринг" АҚ өндіріс процесімен және шығарылатын өнімнің ассортиментімен танысты.

Кездесулер барысында өнімді өткізу нарықтарын игеру, жер қойнауын пайдаланушы компаниялармен ынтымақтастық, ұзақ мерзімді шарттар жасасу мәселелері талқыланды.

Естеріңізге сала кетейік, QazIndustry өнеркәсіп кәсіпорындары мен ірі тапсырыс берушілер арасында ұзақ мерзімді шарттар жасасуға жәрдемдесу бойынша жұмыс жүргізеді, ірі жер қойнауын пайдаланушылармен бірлесіп өндіріске көшпелі турлар ұйымдастырады. QazIndustry мамандары атап өткендей, бұл тапсырыс берушілер мен отандық жеткізушілер арасындағы іскерлік және сенімді әріптестік қатынастарды нығайтуға ықпал етеді.

Мысалы, акционерлік қоғам "Қазэлектромаш" ЖШС-на 178 млн теңгеге алты ұзақ мерзімді кепілдендірілген шарт жасасуға жәрдем көрсетті.

Кәсіпорын ұжымдарымен кездесу барысында Қазақстандық индустрия және экспорт орталығының сарапшылары компания басшылары мен қызметкерлерін мемлекеттік ынталандыру шараларымен таныстырды.

"ҚазЭлектроМаш" компаниясы кабельдік-өткізгіш өнімдерін шығарады. Кәсіпорын орнату сымдары мен қуат кабельдерін шығаратын бірінші дәрежелі жабдықтармен жабдықталған. Ол Қазақстанның кез келген жерінде электр монтаждау жұмыстарын өз бетінше жүргізу бойынша барлық өндірістік-техникалық мүмкіндіктерге ие. Кәсіпорында 190-нан астам қызметкер жұмыс атқарады.

"Азия Энергокомплект" жоғары, төмен вольтты және стандартты емес электротехникалық өнімдерді дайындаумен және реттеумен айналысады. Компания энергетикалық желі жабдықтарын шығарады, штата тәжірибелі инженер - технологтар, дизайнерлер, құрылысшылар-энергетиктер қызмет атқарады.

"СемАЗ" ауыл шаруашылығы және коммерциялық техника өндіреді. Өз қызметі кезеңінде автоқұрастыру зауыты Belarus маркалы трактордың 9 моделін, Shacman жүк автомобильдерінің екі моделін және Dongfeng маркалы жүк автомобильдерінің екі моделін, автобустардың жеті моделін, "Орал" арнайы мақсаттағы және жоғары өтімді автомобильдердің 30 моделін, "ГАЗ" маркалы шағын және орта тоннажды жүк автомобильдерінің 35 моделін және "ГАЗ" және "Хино" маркалы автомобильдердің төрт моделін өндіреді. Кәсіпорында 350 қызметкер жұмыс істейді.

"Daewoo Bus Kazakhstan" компаниясы-Қазақстандағы алғашқы көлік жеткізушісі. Бұл Оңтүстік Корея жабдығымен жабдықталған және әлемдік стандарттарға сәйкес келетін көлік құрастыру өндірісі.

Семей құю-механикалық зауытында броньды танк техникасы жөнделіп, жаңғыртылады. Кәсіпорын өндіріс көлемін ұлғайтып және техникалық қайта жарақтандыруға инвестиция жасай отырып, өнім ассортиментін кеңейтуде.

Естеріңізге сала кетейік, QazIndustry сарапшылары өңірлердегі өнеркәсіп кәсіпорындарының ұжымдарымен кездесуді жалғастыруда. Іс-сапарлардың негізгі мақсаты бизнесті мемлекеттік ынталандыру шараларын түсіндіру болып табылады, ол еңбек өнімділігін арттыруға немесе ішкі нарықта тауарлар мен қызметтерді ілгерілетуге жұмсалатын шығындардың бір бөлігін өтеуден тұрады.

Мемлекеттік ынталандыру шаралары туралы толық ақпаратты qazindustry.gov.kz сайтынан және 8 (7172) 79 33 90 (ішкі. 444) байланыс телефоны арқылы алуға болады.