2024 жылдың бірінші тоқсанының қорытындысы бойынша аммоний нитратының экспорты 6,6 есеге, 11-ден 72,1 мың тоннаға дейін ұлғайды. Бұл туралы «QazIndustry» АҚ ТМК және химияны дамыту дирекциясы хабарлады.

«Экспорт көлемінің өсіміне Польша тарапынан сұраныстың үш есеге (7,2 - ден 21,9 мың тоннаға дейін) және Литва тарапынан - 11,8 есеге (1,6-дан 18,9 мың тоннаға дейін) ұлғаюы әсер етіп отыр», - делінген хабарламада.

Аммоний нитратын тұтынатын негізгі елдердің қатарына Польша (30%), Литва (26%) және Украина (14%) кірді.   

Аммиак селитрасының негізгі отандық өндірушісі «ҚазАзот» АҚ (Ақтау) болып табылады.

Аммоний нитраты экспортының көлемі, тонна

Аммоний нитраты (аммиак селитрасы) – барлық ауылшаруашылығы дақылдары үшін қажет макротыңайтқыш. Қазақстанда белсенді игерілетін барлық ресурс үнемдеу технологияларында кеңінен қолданылады.