Бірқатар жобалар бойынша ынтымақтастық туралы алдын ала уағдаластықтарға қазақстандық делегацияның Ыстамбұлға сапары шеңберінде Түркияның іскер топтар өкілдерімен келіссөздер барысында қол жеткізілді. Бұл сапар бұрын бейнеконференцбайланыс арқылы орнатылған шетелдік инвесторлармен диалогтың жалғасы.

Делегация құрамына ҚР Сыртқы істер министрінің орынбасары Алмас Айдаров, Қазақстанның Түркиядағы Елшісі Абзал Сапарбекұлы, «KAZAKH INVEST» ҰК» АҚ Басқарма төрағасының орынбасары Ғалым Өзбеков, сондай-ақ Қазақстанның жергілікті атқарушы және квазимемлекеттік органдарының өкілдері кірді. Түрік тарапына 30-ға жуық ірі компаниялардың иелері мен бірінші басшылары кірді.

Кездесу барысында Қазақстан-Түркия сауда-экономикалық, инвестициялық ынтымақтастық және инвестициялық ахуалды одан әрі жақсарту мәселелері талқыланды.

ҚР Сыртқы істер министрінің орынбасары Алмас Айдаров өз сөзінде түрік инвесторлары бүгінгі таңда ең белсенді инвесторлардың бірі болып табылатынын атап өтті. Ағымдағы жылдың соңына дейін инфрақұрылым, машина жасау, тамақ өнеркәсібі және ағаш өңдеу сияқты салаларда шамамен $160 млн болатын 5 жаңа инвестициялық жобаны іске асыру күтілуде.

Қазақстанның Түркиядағы Елшісі Абзал Сапарбекұлы өз сөзінде Қазақстан мен Түркия ортақ тарихи, мәдени және бауырластық байланыстары бар стратегиялық серіктестер болып табылатынын атап өтті. 2020 жылдың 8 айының қорытындысы бойынша, пандемияға қарамастан, тауар айналымы $2 млрд-тан асты, бұл 2019 жылдың сәйкес кезеңімен салыстырғанда 1,4%-ға артты. 2019 жылдың қорытындысы бойынша шамамен $360 млн түрік инвестициясы тартылды, бұл жылдық есептеудегі жаңа абсолюттік рекорд болып табылады.

«QazIndustry» Қазақстандық индустрия және экспорт орталығы» АҚ Басқарма Төрағасы Берік Бекенов өзінің бейне үндеуінде Қазақстанның түрік инвестицияларын тартуға мүдделілігін атап өтті. Еліміз көптеген салаларда өңдеу өнеркәсібінде жоғары өсу әлеуетіне ие. Арнайы экономикалық және индустриялық аймақтардың алаңдары инвестициялық жобаларды іске асыруға мүдделі инвесторларды қабылдауға дайын. АЭА аумақтарында түрік инвестицияларының қатысуымен $200 млн-нан астам 10 индустриялық жоба іске асырылды. Түрік бизнесімен серіктестікте битум негізінде кілем бұйымдарын, электрондық-оптикалық аспаптарды, қатты және сұйық гидрооқшаулағыш материалдарды өндіру жолға қойылды.

Іс-шара шеңберінде Қазақстанда өнеркәсіп, АӨК салаларындағы инвестициялық жобаларды, сондай-ақ мемлекеттік-жеке меншік әріптестік тетігі арқылы іске асыруға ниет білдірген әлеуетті инвесторлармен бірқатар екіжақты кездесулер өтті.

Келіссөздер қорытындысы бойынша шамамен $160 млн сомасына 5 келісімге қол қойылды, құжаттар шеңберінде Қазақстанда логистикалық және сауда-ойын-сауық орталығының, жылыжайдың, жылу көзінің құрылысы бойынша жобаларды іске асыру жоспарлануда. Сонымен қатар, газ-электр плиталарын шығаратын зауыт салу жоспарда бар.