2022 жылдың 21 қыркүйек күні «Өңдеу өнеркәсібі апталығы» аясында «QazIndustry» Қазақстандық индустрия және экспорт орталығы» АҚ ұйымдастыруымен «Субконтракт биржасы – 2022» іс-шарасы өтті.

Шараға «Қазцинк» ЖШС,  «ERG Еуразиялық компаниялар тобы» ЖШС, «АрселорМиттал Теміртау» АҚ, «KAZ Minerals» компаниялар тобы,  «Өзенмұнайгаз» АҚ, «Қазақмыс корпорациясы» ЖШС, Қарашығанақ Петролиум Оперейтинг Б.В., «Казфосфат» ЖШС және т.б. ірі жер қойнауын пайдаланушылар, сондай-ақ, 50-ден астам отандық тауар өндірушілер қатысты.

Субконтракт биржасы – 2022 пленарлық отырысын «Qazindustry» Қазақстандық индустрия және экспорт орталығы АҚ Басқарма Төрағасы Берік Бекенов ашты. Өз сөзінде ол сарапшылар мен бизнес-қауымдастықтар өкілдерінің қарым-қатынасы мен пікір алмасуы үшін іс-шараның маңыздылығын атап өтті.

«Кәсіпорындарға жаңа жеткізушілерді іздеуге жәрдемдесу - бүгінгі күн тәртібіндегі маңызды міндет және ұйымымыздың негізгі құралдарының бірі болып табылады», - деді акционерлік қоғам басшысы.

Биржаның негізгі мақсаты жергілікті қамту үлесін ұлғайтуға, қазақстандық бизнесті дамытуға және олардың ішкі нарықтағы әлеуетін ашуға жәрдемдесетін тауарларды, жұмыстар мен қызметтерді өндіру және жеткізу мәселелері бойынша кооперациялық байланыстарды жолға қою үшін тапсырыс берушілер мен өнім берушілер арасында тиімді B2B кездесулерін ұйымдастыру болып табылады. V биржа барысында қатысушылар үшін арнайы B2B алаңдары құрылды, онда шағын және орта бизнес өкілдері өнімді дайындау және жеткізу мәселелері бойынша байланыс орнату үшін тапсырыс берушілермен кездесті.

Іс-шара қорытындысы бойынша кәсіпорындар жалпы сомасы 6 млрд. теңгеден асатын өзара ұзақмерзімді келісімшарттар мен оффтейк-контрантқа отырды. Атап айтсақ, «Казцинк» ЖШС мен «ROGR Electronics» ЖШС құны 350 млн. теңгеге офтейк-келісімшартқа, «Kazminerals» компаниялар тобы мен «Новопэк» ЖШС 4,3 млрд. теңгеге, сондай-ақ, «Kazminerals» компаниялар тобы мен «ПК ДАС» ЖШС 1,8 млрд. теңгеге ұзақмерзімді келісімшарт жасасты.

Өз кезегінде, биржа қатысушылары іс-шараның маңыздылығын және оның жүйелі түрде өтуі қажеттігін атап өтті.

Анықтама үшін: Субконтракт биржасы төрт жыл ішінде әлеуетті тапсырыс берушілер мен жеткізушілердің өзара іс-қимылының тиімді құралы ретінде өзін көрсете білді. Биржа алаңында ғана 12 кооперациялық келісім, ынтымақтастық туралы 8 меморандум және 3,7 млрд.теңгеге 3 ұзақмерзімді келісім жасалды.